ڪنهن به رياست طرفان ٻيءَ رياست جي ڪنهن اهم شهر ۾ پنهنجي شهرين ۽ قومي مفادن جي لاءِ مُک سفارتخاني کان سواءِ ٻين هنڌن تي کوليل دفتر کي ”قونصلخانو“ سڏجي ٿو. هن قسم جي سفارتي آ فيسن ۾ ويزائون جاري ڪرڻ کان سواءِ ٻيا انتظامي ڪم ڪاريون، تقافتي، تعليمي ۽ سماجي سرگرميون به منقعد ڪرائي سگهبيون آهن. ڪنهن به ملڪ جي گاديءَ واري هنڌ سميت سندس اهم شهرن ۾ کوليل سڀ قونصلخانا، انتظامي طور مک ۽ با اختيار سفير جي ماتحت ڪم ڪندا آهن، ۽ سونپيل سرڪاري ڪم کان سواءِ، سفارت خاني جي علاقائي دفتر طور ذميواريون ادا ڪندي، سفارت خاني طرفان ڏنل سياسي ۽ معاشي هدايتون بجا آڻيندا آهن. اڄوڪي دور ۾ عام طرح سان ”قونصلخانا“ پنهنجي ملڪ جي واپار، ايڪسپورٽ ۽ ڪاروباري معاملن ۾ خصوصي دلچسپي وٺڻ سان گڏ ترقياتي رٿائن ۾ اڳڀرائيءَ جي سلسلي ۾ اهم ڪردار ادا ڪن ٿا. عام طور قونصلخاني جي سربراهه کي ”قونصل“ جي نالي سان سڏيو وڃي ٿو، البت اهم ترين ۽ وڏن شهرن ۾ قائم ٿيل اهڙن دفترن جي ”قونصل جنرل“ جي نالي ۾ وڌيڪ سينيئر آفيسر سربراهي ڪندو آهي. ان کان علاوه ڪن هنڌن تي مهمان ملڪ جي ڪنهن باشندي کي سفارتخاني طرفان ”اعزازي قونصل“ به مقرر ڪيو ويندو آهي، جيڪو محدود معاملن ۾ مليل هدايتن تحت پنهنجون سرگرميون ادا ڪري سگهندو آهي. ننڍن سفارتخانن ۾ ”قونصل“ سفارتڪار کا پوءِ ٻئي نمبر جي عهدي تي هوندو آهي ۽ کيس نائب سفير طور به ڳڻيو ويندو آهي